Cors y Llyn
 Saif Cors y Llyn rhwng Pentref Nebo a Llyn Cwm Dulyn
mewn man arbennig o brydferth gyda golygfeydd o Eryri
yn ei gogoniant.
Mae gwybodaeth am Gors y Llyn yn y ddogfen ‘Arolwg
Biolegol o Diroedd Comin - Rhanbarth Arfon‘ hefyd ‘Arolwg
Tir Gwlyb Cymru’.
Mae'r gors yn cael ei disgrifio fel lle gwlyb iawn,
efallai yn rhy wlyb i bori da byw. Yn 1991 (adeg yr
arolwg), roedd y safle mewn cyflwr da ac roedd cyn
lleied o losgi a draenio wedi gwneud lles mawr i'r
bywyd gwyllt.
Mae yna blanhigion fel eurinllys y gors, llugaeron,
helyg, peiswellt, tegeiriannau a chyfoeth o fwsoglau
a llysiau'r iau gyda 12 rhywogaeth o figwyn. Roedd
y prysgoed yn cynnig safleoedd addas i adar a thrychfilod,
a chofnodwyd y llinos a bras y gors yn ystod yr arolwg.
Ceir 22% o'r comin (y darn canolog) ym Mharc Cenedlaethol
Eryri, ond mae'r gweddill wedi ei gofrestru fel tir
Cyngor Plwyf Llanllyfni, ac mae'n debyg mai cyfrifoldeb
Cyngor Plwyf Llanllyfni yw rheoli'r safle. Cofrestwyd
y gors fel Safle Arbennig o Ddiddordeb Gwyddonol. |
